Dr Zyschtig (Oder au: Durch den Monsun!),
12. Meerz 2019
An dr Kinderfasnacht nämme mirs immer chli gmietlich.
Am Nommidaag wird nit gspielt sondern eifach gmeinsam öbbis unternoo.
Do mir das Joor s 35 Jöörige hänn dörfe fiire, hänn mir vor em Gladdi-Addore-Käller e glaine Apero gmacht.
Härzligge Dangg an d Gladdi-Addore, wo uns dr Platz und dr Zapfhahne zur Verfiegig gstellt hänn.
E bsunderi Freud isch für uns vor allem dr musikalischi Bsuech gsi.
Als erschts sin d Spezibalischte e Ständeli cho bringe.
Drnoo sin d Gugge-Mysli iitruudlet für e Ständeli und das sogar mit dr junge Garde! E ganz e bsunderi Sach. Mir hoffe de Mysli-Binggis hets gfalle, ihr händ das super gmacht!
Nachdäm mir au d Mysli wieder hänn miese verabschiide, ischs nit lang gange und me het vo witem scho dr unverkennbari Gladdi-Addore Stil ghört.
Au sie sin äxtra für uns e Jubiständeli cho bringe.
Viele Dangg an d Spezibalischte, d Gugge-Mysli und d Gladdi-Addore. Es het uns e riese Freud gmacht, dass ihr sind cho spiele für uns.
Dr Nommidaag isch schnäll duure gsi und denn ischs au für uns wieder zur Sach gange!
Ab ins Grossbasel…. Und zwar go….
Z Nacht ässe! Vom Apero zum Z Nacht… Mir hänns scho sträng kha das Joor eieiei.
Mir hänn im Hotel Radisson, wie sichs ghört, no e paar Begriessigs-Stückli gspielt, bevor mir kulinarisch verwöhnt worde sin.
Aber denn! Jä! Denn ischs wirklich los gange für uns.
Nach em Ufftritt im Wolki isch denn au scho bald Zyt gsi für unser alljöörlichs Platzkonzärt bi dr alte Hauptpost.
Mir hänn s Platzkonzärt chuum aagfange, isch scho e grossi Truube Mensche um uns versammlet gsi wo mitgschunklet, mitklatscht, mitgsummt und gjublet het.
Genau für das proobe mir so intensiv… Für d Lüt am Strooserand und an de Konzärt.
Und denn bechunnt me so e tolls Feedback….
Das stellt eim grad d Höörli an de Ohre uff.
Nach em Platzkonzärt ischs denn witer gange ind Schluggstuube, wo mir bereits erwartet worde sin.
Wie mirs gschafft hänn, in die randvolli Schluggstuube z cho, isch mir fascht e Rätsel. Aber das isch au egal, well d Stimmig so super gsi isch dört inne, dass mes gärn in Kauf nimmt, sich dur d Mängi z wurschtle.
Denn hets gheisse YYSTOO! Richtig Glaibasel… Kein het zu däm Zytpunkt gwüsst, was uns uff em Wäg dört ane erwartet…
Chuum uff dr mittlere Brugg aacho, het dr Petrus alles gäh! Als ob är uff uns gwartet het. Villicht ischr chli niidisch gsi uff unseri scheene Bärt?
Es het agfange winde und rägne als ob Basel untergoot.
Sälbscht alt-igsässeni Zwärgli hänn mir bestätigt, dass sie das no nie erläbt hänn.
Spiele isch für d Blöser nümm möglich gsi (Usser me hätt s Mundstigg in Wind ghebbt… Die Idee het aber keine kha)
Alli hänn nur no ihri Larve uff e Kopf druggt und hänn ghofft, dass es uns nit mitsamt de Instrumänt in Rhy bloost.
Jede vo uns isch froh gsi, wo mir bim Hotel Merian hänn chönne in dr Durchgang zur Rhypromenade flüchte.
Zum Glück ischs egal gsi, dass d Kostüm nass worde sin… Immerhin isch au alles andere vo Kopf bis Fuess nass gsi. Do spielt das au kei Rolle me.
Nach däm Erläbnis het uns denn unsere Major, vernünftigerwiis, langsam aber sicher wieder zum Gladdi-Käller gfiehrt, wo mir no chli zämmeghögglet sin und unseri Kleider hänn chönne uswringe….
Daniela