Übung macht den Meister
Am Samschtig, 19. Novämber 2022 het sich e tolli Truppe Gugge-Zwärglis am achti am Morge z’Prattele uf em Parkplatz von dr Windrose troffe. S’Stimmig isch scho vo Afang a sehr usglasse und luschtig gsi, es si Witzli gamcht worde und me het sich gneckt, wie’s halt bi eus eso üblich isch.
Au euse Choch dr Peter isch scho voll parat gsi, usser dass är sini Hose bereits mit eme Schluck Schnaps dekoriert het. D’Torte isch so tränkt gsi, dass si usgloffe isch . Also hopp hei mir eus alli in d’Auto gsetzt und los isch’s gange Richtig Kiental.
Aber mir wäre jo nid d’Gugge-Zwärgli, wenn mir nid a dr Autobahn-Raststätt Münsige dr obligati Zwüschehalt gmacht hätte um eus no vor em proobe richtig z’stärke. Nachdäm ig im Christopher sini Froog – «i wellem Kanton si mir do» – als erschte richtig beantwortet ha isch mir d’Ehr zuecho dä Bricht do dörfe z’schriibe.
Im Kiental acho hei mir eus schnäll im Huus igrichtet und d’Zimmer bezooge. Au dr Proobe-Ruum isch subito parat gsi und denn isch’s au scho gli losgange mit spiele. Nach de erschte Stückli si mir denn gli regischterwiis a de Lieder go schaffe.
So vill musiziere git natürlich richtig Appetit, drum si mir alli froh gsi wo eus dr Peter es super feins Mittagässe parat gha het. Binere feine Chürbissuppe, Schinkli und Härdöpfelsalat hei mir eus gstärkt für e Nommidag. Nach em Ässe het’s aber z’erscht no e Fotitermin geh, nach es paar Versüech si denn die Bilder im Chaschte, resp. im Händy gsi.
Dr Nommidag isch sehr effiziänt gsi, immer wider si mir im Proobe-Ruum zämmecho zum witer a de Stückli schliffe, si wider regischterwiis go üebe und pröble, bis die Liedli als wie besser tönt hei. Zum Glück het’s au immer wider emol e Pause geh zum dureschnuufe und sich stärke.
Eso isch dä Nommidag im Flug vorbi gange und dr Peter het eus zum Nachtässe an Tisch bätte. Alli hei grossi Auge gmacht: Salattäller, Filet im Teig, Spätzli, Gmües, schlicht alles was s’Härz begehrt. A dere Stell nomol ville Dank im Peter, es isch eifach hervorragend gsi. Bevor’s denn au no es feins Dessert gäh het si die föif Neumitglieder vom Major usem Ruum gfiehrt worde. Nachdäm jedes einzeln wider isch ine gruefe worde si mir alli als definitiv-provisorischi Zwärgli ufgno worde. Ig ha denn au no grad dörfe mis «Ufnahme-Liedli» zum Beschte geh wobi mir alli Zwärgli bim Refrain super unterstüzt hei.
Denn het’s nomol e Proobe-Session geh bevor mir denn gmietlich no zämme ghockt si und 1,2,3,4….. oder so ähnlich vill zämme gno hei.
2 wichtigi Sache mues ig no erwähne:
zu spoter Stund hei mir no Bsuech vo de Chippendales übercho, was s’Nicole und s’Chantal sichtlich gnosse hei…. Danke a die beide Protagonischte Andi und Maurice
…. und e bsundere Dank an Thommy, wo eus mit sim «Ur-Furz» e zusätzlichi Pause verschafft het
Eso isch dr erschti Dag vorbi gange und alli si ab ins Bett, die eine echli früehner, die andere echli spöter.
Am Sunntig am Morge het’s uf eimol afo chessle dusse, euse Schlag het’s nid chönne lo si und het eus alli us de Bettli gholt.
Zum Glück si mir grad mit eme tolle Morgeässe vom Peter verwöhnt worde. Spiegeleier mit Späck, früsche Zopf, Chäs, Fleisch, alles het’s gha und natürlich au hektoliterwis Kaffi. Eso si mir gli wider fit und munter gsi und hei nomol richtig Gas geh bim proobe.
Scho gli isch’s denn aber Zyt gsi zum s’Huus z’putze und i getrau mi an dere Stell mol z’behaupte es isch suberer gsi als wo mir cho si. Au do hei mir Zwärgli ganzi Arbeit gleischtet. Nach em Verabschidigs-Prozedere si mir denn alli wider heigfahre.
S’Proobe-Weekend het richtig Spass gmacht und i freu mi scho uf’s nöchschte!!!
Mit ZwärgliGruess
Megge
