Nach wuchelangem proobe in dr dunggle Zwärge-Höhli, hänn mir am 21.9 ändligg wieder emol dörfe an dr früsche Luft und vor Publikum go spiile und unseri Stüggli präsentiere.
Unsere Larvemacher, dr Dildi und si Team, het uns nämligg iglaade zum an sinere Vernissage go spiile. So hänn mir uns also am halb 8ti zoobe besammlet in Münchestei und sin, nach eme kurze Locationcheck, igstande und sin spiilend losgwagglet.
Es isch meini denn e tolls Atelier, wo sich dört befindet und es het so viel Platz kha, dass mir glaine Zwärgli ganz kuschlig nooch hänn miese zämmestoo, dass keins vo uns verloore goot, zwüsche all däne prächtige Laarvene.
D Stimmig isch super gsi und i glaub d Zueschauer hänn Freud kha an unserer Muusig.
Dr einzig Noochdail isch gsi, dass mir die ganz Zyt dr feini Duft vo Crépes in dr Naase kha hänn während em spiile.
Leider hänn mir aber miese warte, bis mir fertig gsi sin mit unserem Ufftritt.
Mir sin jo aaständigi Zwärgli und mämpferle nit während em spiile… Leider!
Nachdäm mir 5 vo unserne Stiggli zum Beschte gää hänn, isch denn dä Ufftritt au scho duure gsi.
Immer viil z schnäll wie ich find, aber mir chönne jo leider au nit die ganz Nacht duurespiile.
E paar vo uns Zwärgli hänn sich denn drnoo äligg am Crêpes-Stand dörfe verköschtige und öbbis Kiehls zum abespüele hets au gäh.
Mir wänn an däre Stell härzligg im ganze Dildi-Team dangge für d Möglichkeit bi Euch z spiile und au für dr feini Spiis und Trank!
Euri Guggemuusig Gugge-Zwärgli.
Daniela
Menü