Zum Start vo de Summerferie hän mer uns zum traditionelle Grillplausch uf em Sulzchopf troffe. Bi heisse 30 °C und eme angnähme Lüftli hän mers uns mit früschem Sangria guet go loh. Au de Grill isch Dangg em Fritzli pünktlich parat gsi und jedes Zwärgli het chöne drufschmeisse, was es het welle. Au sin vili Zwärgli im vorrus flissig gsi und hän für es grosses Buffet gsorgt. Do es ganz härzlichs Danggeschön an alli!
Zäme mit uns hän no es paar anderi Lüt s guete Wätter und die tolli Ussicht döt obe gnosse und de Théo het sin Geburtsdaag gfiiret. I däm Sinn: Bon anniversaire pour tes 60 ans Théo!
Wells so schön sunnig gsi isch, het de Baloo nätterwis es Zält mitbrocht gha, wo bi villne für Kopfschmärze gsorgt het (me chönt sich dugge, muess me abr nit). Es isch au faszinierend gsi, dass das Zält schinbar nit wasserdicht isch und es drunter grägnet gha het.
Nach em Ässe sin mer gmüetlich im Schatte gsässe und hän über alles und nüt gredet. Händ ihr gwüsst, dass unseri Obfrau nit gärn nass wird? Oder dass unser Seniorezwärgli hätti chönte Fritz heisse? Und villicht hätte es paar meh Chleider nit gschadet 😉
Alles in allem ischs en super Daag gsi, es grosses Dangge an alli!