Dr Fasnachtsmäntig 2019

Sali zämme Wie allewyl am Morge vom Fasnachtsmäntig, platzt me fascht vor Vorfreud! Das kenne mir doch alli… Aber das Joor ischs no chli spezieller gsi! Mir hänn dörfe in unser neus Stammkostüm schlüpfe! S Däschli paggt, s Mundstigg oder d Schleegel sin parat, Labello und Tape für d Finger ebefalls und s Instrumänt isch uff Hochglanz poliert! Also…. Ab uff d Claramatte. Dört träffe sich nämligg d Zwärgli am 11i. Aber nit alli…. Nur d Blöser.. ! Dr Major (wo bis zu däm Zytpunggt no niemert gseh het in sinere Vollmonduur), s Schlagregischter und dr Vortraab träffe sich nämligg bim Käller vo de Gladdi-Addore, zum s Sujetwägeli abhoole und e scheeni Tradizioon z wahre: Begleitet vomene Lyramärschli, lauft die Handvoll Zwärge zur Claramatte, wo d Blööser scho sehnsüchtig warte. All Joor e High-Light! Nach ihrer Akunft, het unsere Major denn si Stägge überreicht becho und het somit s Zepter für die „drey scheenschte Dääg“ ab däm Zytpunkt in dr Hand kha. Anschliessend hänn mir unser Sujetwäägeli spielerisch dörfe enthülle. Viele Dangg nomol an däre Stell, an alli wo das wunderbare Wägeli baut hänn! Die Zwärge-Höhli isch so liebevoll gmacht gsi. Und no e Dangg ans Geburtsdaagskind, wo uns dr feini Apero im Pavillion offeriert het im Aschluss. D Luune isch guet gsi… Aber nur unseri. Im Petrus sini nit! Us em nüt use, hets uns eimol quer dur alli Jooreszyte katapultiert. Vo Hagel über horizontale Räge bis Sunneschiin. So e offene Pavillion bietet nit wirklich Schutz…. Das wüsse mir jetzt. Aber drfür isch s neue Stammkostüm denn au tauft gsi und me het e Grund kha, sich im Räpplispalter-Käller mit eme Frosch oder eme Lutz uff z wärme. Aber pünktlich zum Cortėge, hets denn wieder einigermasse uff do und mir sin die üsseri Route entlang marschiert, mit e paar Päuseli zwüscheduure. Fasnachtsluft… Isch halt aifach die scheenscht Luft! Ab und zue hets amigs no paar Räägetropfe gäh, aber das nimmt e Zwärgli mit Glasseheit. Wo dr Cortėge denn ume gsi isch, hänn mir im Gladdi-Käller no e Ständeli brocht, bevor mir dört hänn dörfe z Nacht ässe, während mir vo de Gladdi-Addore ebefalls e musikalischi Iilag hän dörfe gniesse. I glaub mir hänn dört scho alli gwüsst, dass mir nach däm nass-kalt-warm-nass-kalt-warm-nasse Daag nit all zu alt wärde hüt. Aber natürligg hänn mir noni schlapp gmacht! Nach 2 Ufftritt vor em Schoofegg und em Öchsli, sin mir no e paar Baize go bsueche und hänn dört au nomol alles gäh! Und so schnäll wies aagfange het, so schnäll ischs au wieder ume gsi mit em erschte Fasnachtsdaag. No e Doonbrötli als Magestopfer und öbbis z güügele als Schlummerbächer vor em Heimwäg und bis morn…… In alter Frische. Daniela