D Zwärgli am Schotteröggli z Prattele
Dr Deal isch gsi: Du chunnsch zu eus cho Sousaphon spiele und mir chöme defür ans Schotteröggli uf Prattele. Deal isch Deal, aber wenn d Gsundheit eim e Strich dur d Rächnig macht, denn chas anderscht cho. In däm Sinn rächt gueti Besserig resp. baldegi Genesig em Patient und mir hole alles noche.
Dr eigentlich Start in d Vorfasnacht hämer am Samschtig 11. Februar 2023 gmacht. Ufritt am Schotteröggli in der Alte Dorfturnhalle isch uf em Plan gschtande.
Besammlet hämer eus bi dr Tramändstation zPrattele und si denn spielend Richtig ADH gloffe. Nach so langer Zyt und für einegi s’erschte Mol mit Larve, schon no gwöhnigsbedürftig, aber e gueti Üebig.
Scho gli hedds gheisse parat mache und mir sin im Foyer igschtande. Wod dTüre uf isch, simer in d Hallemitti und hän wie beuftreit, drei Lieder gspielt. Mit Applaus isch eusi Ylag verdankt worde. Au farblich – in gäl-schwarz – hämer perfekt uf Prattele passt, was de Ur-Prattler natürlich ufgfalle isch.
Plant isch au gsi, nach em offizielle Programm ind Halle zgoh und denn nomol zspiele. Au das hämer gärn gmacht, vor allem well s Publikum super mitgmacht hedd. So machts grad no meh Spass. Eusi Lieder hedd me kennt und händ zum Mitsinge agmacht. Mit gueter Stimmig, ere Zuegob und eme zfriedene Lächle im Gsicht isch denn dr zweiti Uftrtitt sehr guet über dBühni.
Zweine Geburtstagskinder – und das per Zuefall am gliche Tisch – hämer no spontan es Ständeli gsunge. Beidi hän sichtlich Freud gha.
Die einte Zwärgli hän denn no dusse e Holdrio gnoh zum Ufwärme oder es Bierli gege dr Durscht und nach em Pläuschle sin denn d Zwärgli nodisno Heimwärts gange. Schliesslich ischs am negschte Dag in dr Lange Erle witer gange…
Bis zum neggschte Mol am Schotteröggli zPrattele – mir wurde eus freue.
E Tröötli