Im Proobeweekend mache mr nid eifach Musig sondern me erläbt au no einiges denäbe. Zum Usefinde was denn do alles so passiert hän mir alli ahwäsende Zwärgli gfroggd was si so erläbt hän an däm Wucheänd (das macht s Bricht schriibe einiges eifacher xD).
Mit Abstand am mäischte erwähnt worde isch s feine Ässe wo mir hän derfe gniesse, e härzligs Danggscheen unserer Kochmaschine Peter an dere stell, und natürlig au sim flissige Ghilf em Fonsi ;). Au s trinke isch gued ahkoh, scho no cheibe gued dä „Highland Park“…, wenn au de fählende Möglichkeit e Gummibärli z trinke noochedruurt worde isch. Normalerwyys verlöhn s Proobeweekend glyychviel Lüüt wie am Samschtig au ahgreist sin, doch unsri Obfrau het unterwäggs derfe s „Münsi“ adoptiere und het das Einhorn derfe in ihri Familie ufnäh. Mr hän vieli tolli Gsprööch mitenander dörfe führe und au süsch vieli tolli Momänt mitenander verbrocht – vom „Quartett“ spiele bis zum YMCA singe.
A propos singe: Das Wucheänd hän mir viel und oft derfe singe, sigs e Geburstdaagsständli für dr Baloo, s YMCA bim Shötli-Glücksrad, zwei Konzärtylage ( ♪ …d Ohre göhn immerno so… ♪ ) oder au im Proobesaal, mir Zwärgli könne ebbe nid nur Instrumänt spiele sondern au super singe – siiged ruhig uf die näggschte Ufdritt gspannt. Mir hän au neui Lieder und Schlag-Märschli ystudiert und dodebyy viel Freud ka. Mänggi Zwärgli hän sich au an andere Instrumänt derfe ustoobe und dodebyy richtig gstrahlt.
Trotz kleinere Vorfäll isch s Wucheänd richtig harmonisch abgloffe und e mega tolli Zyyt gseh. Dangge dodefür allne Zwärgli sowie natürlig de Fabiola und em Thommy fürs Organisiere. Dä Bricht abschliesse wänn mir gärn mitme Zitat: „S isch e geili und instensivi Prob gsi!“
Liebi Griess
Andi & Etienne
