Niggi Näggi 02.12.2023
Zum Afang vo dr «Mariah Season» hän mir uns im wunderschön verschneite Sissach troffe. Mit ere sprichwörtlich strahlende Erschinig het de Etienne zuesätzlich für e festlichi Stimmig gsorgt.
Vom Bahnhof isch es denn witer gange bis zum e chline rote Hüsli. Vo usse isch es relativ unschinbar, abr dr Schin trüegt do zimli. Das Hüsli het e langi Gschicht vom Gfängnis zum Zollhüsli zum Metzger und wider zruck zum Gfängnis. Hützutags beherbergt es s Hänkermuseum. In zwei Gruppe sin mir durch die drei Stöck gführt worde, wo eini vo de gröschte Sammlige an historische Folter- und Richtwärkzüg deheime isch. E beidruckendi Aglegeheit, wo nüt für sanfti Gmüeter isch. Vo de eifache Schandmaske und Fingerschrube zu funktionierende Modäll vo Guillotine bis zum elektrische Stuehl, isch für jede Gschmack öppis derbi gsi. Und nit z vergässe e Schandflöte für Musikante, wo d Tön nit richtig troffe hän (schluck).
Nachhär sin mer denn witerzoge in Chäller vo de Güllepumpi z Fränkedorf. Nach ere sehr usführliche Instruktion zu de Funktionswis vome Fondue-Caquelon vom Maurice hän mer denn chöne afo rühre. An unserem Tisch het die üsserscht wichtigi Ufgob de Fonsi (aka Marc) überno und het sin Lehrmeister de Peter unglaublich stolz gmacht. Es folgt e gfrässigi Stilli, unterbroche durch diversi Diebstähl vo einere Pfanne in die Nägschti.
Nach em Ässe isch es denn ans Wichtle gange. Mir hän e wunderbare Bärg an Gschänkli gha, wo ein nach em andere het döfe sich eins ussueche. E breiti Uswahl an Sache isch do füre cho. Es Highlight sicher de Nicole ihr neues Nashorn. Nur s Päckli isch bitz schlampig ipackt gsi, villicht hetti es bitzeli meh Kläbstreife gholfe (also meh als die zwei Rolle, wos scho drum gha het).
Alles in allem isch es en sehr gsellige Obe worde, wo viel gredet und glacht worde isch.
En grosse Dank goht an d Jeanne und de Maurice fürs Organisiere vo däm tolle Daag.
Jetzt gohts witer mit flissig üebe, demit au jo niemert e Schandflöte aglegt griegt an dr nägschte Fasnacht.
Bimsel, Bämsel, Bam,
Nina
