Was gitts z Brislach was es ufem Sulzchopf nid gitt? Genau, e Schwümmbeggi. Und exaggd us däm Grund hän d Chantal und dr Megge zu sich häi yglade und mr hän unsre Grillplausch ins Laufetal brocht.
Pünktlig zum Mittag isch au scho dr Grill barat gseh und s het e ordentlichs Buffet gäh, wo dank vielne flissige Zwärgli z’stand koh isch. Bim Gedangge ans Dessert-Buffet lauft mr schowidr s Wasser im Muul zämme. Au isch übr s neue Goschdym gschwätzt worde – s wird super, abr PSSST!
Obwohls kei Maledivewätter gäh het hän sich glyych immerwidr einigi Zwärgli ins kalte Nass traut. Spööter het me im Beggi au no em Andi sini Kleider gwäsche, genauer betrachtet het är si sogar no ah ka – abr das isch jo nur e Detail.
Gegene Oobe het sich dr Daag super usklinge loh näbeme gmietlige Lagerfüür, bi glatte Gsprööch. S isch au schöön gseh sin näb de Zwärgli no einigi Passive, Fründe und Ahhäng debyy gseh. Ich wett mi do nomol härzlig bi de Gaschtgäber für d Gaschtfründschaft bedanke und au bi allne ahwäsende Zwärgli für dr glatti Daag.
LG euer ständig umparkierends Fröschli
